In difesa del Difensore Civico / 3
Gh’era na volta n’uficio del difensor civico che’l cercheva de far el so dover. l’ha lavora zito zito per qualche an a sistemar beghe e soprusi vari dele aministrazion o magari per spiegarghe al citadin che no’l gaveva rason a brontolar. Dopo qualche an el se acort, tirando en po’ le some, che en tanti comuni le robe no le neva propi come le doveva. El por om che’l gaveva qualche question en bal co’l so comun, el troveva soluzion diverse a seconda de en do che era na el so voto a l’ultima votazion. Posibile che suceda ste robe chi nel nos trentin?
Varda che te varda, porco cane, l’impresion l’era propi quela, semper pu confermada dai casi che ariveva en uficio. A quel punto, vista l’importanza dela question, pu bel che aspetar la prima ocasion e dirghel al capo no ghera no? “Sal che secondo mi ghè en po’ de mafieta nei nosi bei comuni? Ma giusta apena na spolveradina neh”.
Diré voi: ”Osta che brao sto difensor, el sarà sta content el capo che el ghe da na man a dar pu democrazia e trasparenza!”.
”Parlare di mafia offende la dedizione e la correttezza di tanti amministratori”. El ga rispondu’ così envece, e’l ne ga avù anca per mal che la matina dopo no la gnanca vardà i cartoni de Haidi ale ot e meza.
Ma digo mi: co’n na parlada del genere el difensor no’l voleva miga ofender i aministratori onesti che sicuramente e per fortuna i è tanti, ve no. L’era na bela tirada de rece a quei che envece i dropa certi sistemi propi per tignirse en bona i so lecapè, e che no i usa mai el stes meter per do misure diverse.
Ma oltre che no vardar i cartoni de Haidi, la pensà anca (el capo) ala salute del difensor e de torghe via en po’ de lavoro. El ga dit che l’è ora de finirla che i citadini i vaga a farghe perder temp per question che i ga co’l so comune e che magari per farlo i deve butar via benzina e nar fin a Trent e magari enquinar anca (e chi se vede la nobile anima ambientalista del capo). “Fen na lege en avril che la ghe toga i poteri al difensor civico de controlo e conciliazion dele question tra citadino e publica aministrazion. Da chi en vanti sarà el comun che el nomina dele autorita competenti per sistemar ste benedete question”.
Bela roba! Un de do che discute el se tol chi che’l vol per farse dir se’l ga rason o no. Ma sente mati? Se ghe volest ani de beghe per gaver sta figura e ades che la ghè e la cerca de far ben el so mister se ghe mete i pai fra le rode? Tanti che ades i è asesori en Provincia i è stadi sindaci o consiglieri en comuni grandi o picoi. Alora, o sti chi i va dal capo e i ghe dis come dal vera va le robe da tante bande, o i ciapa i so straci, i monta su la prima coriera e i va a casa, almen per coerenza con quel che i ha promes quant che i neva a tor su i voti.
El savé, gent, en quanti casi è sta risparmià de nar en tribunal perché tut el s’è risolto nel’uficio del difensor? Ma volente averger i oci e vardar come i ne trata i nosi politici na volta che i avem mesi sula carega? E vardé che chi scrive el ga dat el voto a sti chi, ma purtropo no l’è en problema de color. l’è en sistema enpostà en de’n certo modo. Ma provem a far qualcos, ciapé en man el telefono, el fax, el computel come diseva me mama, e diseghe a quei che gavé dat fiducia (e anca el voto) che i se descanta n’atimin.